Banksy og Warhol í eina sæng

Í menningarmiðstöðinni The Hospital Gallery er nú att saman New York-listamanninum Andy Warhol og breska götulistamanninum Banksy. Þó þessir tveir listamenn eigi alls ólíkan bakgrunn er list þeirra ekki svo ósvipuð og sést það á sýningunni þar sem verk þeirra eru sýnd saman.

Á meðal verka Banksys á sýningunni er portrett af Winston Churchill í anda Warhols. Listaverk af Tesco-súpum í stað þeirra frægu Campbell's frá Andy og Kate Moss stílíseruð líkt og Marilyn Monroe.

Banksy er sennilega þekktastur fyrir að fíflast í alvarlegum listasöfnum og tókst meðal annars að lauma mynd í anda fornu hellamyndanna inn á British Museum en hans mynd var ólík hinum að því leyti að hellisbúinn ýtti innkaupakerru á undan sér. Einnig er hann bráðsnjall graffiti-listamaður og afar virtur í þeim geira.

The Hospital er í Covent Garden og var sett á stofn af Dave Stewart í hljómsveitinni The Eurithmics. Í þessari skemmtilegu miðstöð má meðal annars finna kvikmynda-, sjónvarps- og upptökustúdíó, listagallerí, bókasafn, þrjá bari og fleira en miðstöðin hefur breytt nánast ónýttu horni af Covent Garden í fjölsóttan og áhugaverðan stað.