Flöskuskeyti varð kveikjan að norsk-íslenskri vináttu

Nikulás Tumi Hlynsson fékk skemmtilega heimsókn á föstudag. Þá kom hin fimm ára gamla Linnéa Nana Christensen frá Noregi til landsins ásamt fjölskyldu sinni, en hún fann flöskuskeyti frá Nikulási í fyrra.

„Nikulás sendi skeytið frá Ísafirði fyrir tveimur árum," útskýrði Nanna Karólína Pétursdóttir, móðir Nikulásar, sem er átta ára gamall. „Þau settu sig svo í samband við okkur núna í júní, þá var ár síðan að þau fundu skeytið." Nanna segir börnin bæði vera spennt yfir heimsókninni. „Sú litla flögrar hérna um eins og fiðrildi," sagði hún. „Og svo held ég að allir vinir hans Nikulásar séu núna að undirbúa skeyti," bætti hún við.

Nikulás segist ekki vera viss um hvaðan hann fékk hugmyndina að því að senda skeytið af stað. „Ég bara veit það ekki alveg, mér datt þetta bara í hug," sagði hann. Hann segist ekki hafa reiknað með því að skeytið myndi finnast, en vonaðist þó til þess. „Ég setti mynd sem ég teiknaði af húsinu mínu í flöskuna, og svo nafn og símanúmer," útskýrði hann. Faðir Nikulásar bætti svo við haus af forsíðu Fréttablaðsins, til að hafa dagsetninguna með í för. Nikulás útilokar ekki að þau Linnéa verði bara pennavinir í framtíðinni, þó þau notist þá kannski við hefðbundnari póstsendingar.

Hedda Christensen, móðir Linnéu, segir dóttur sína hafa verið afar spennta yfir flöskuskeytinu. „Við vorum á ferðalagi alveg nyrst í Noregi, ég, dóttir mín og unnusti minn. Við fórum í göngutúr meðfram ströndinni, þar sem það lágu fullt af gömlum bátsvélum, og undir einni slíkri vél fundum við flöskuna," útskýrði Hedda.

Fjölskyldan hafði lengi haft í huga að koma hingað til lands, og með tilkomu flöskuskeytisins fannst þeim ekki annað hægt en að heilsa upp á Nikulás og fjölskyldu hans. Þau hyggjast dvelja hjá þeim yfir helgina, en halda aftur á heimaslóðir eftir viku.

Hedda segir Linnéu ætla að senda flöskuskeyti á meðan á dvöl þeirra hér á landi stendur. „Við ákváðum að gera það á Íslandi, það virðist ganga vel," sagði hún. „Þetta er ótrúlega skemmtilegt, það er allt annað en sjálfgefið að flöskuskeyti komist til skila," bætti hún við.