Þrýst á poppstjörnur að hylja líkama sinn

Strangtrúaðir múslímar í Malasíu beina þeim tilmælum til poppstjarna sem hyggjast koma fram í landinu að klæðast efnismeiri fötum og draga úr ögrandi danshreyfingum. Múslímskir stúdentar og andstöðuflokkurinn í landinu eru meðal þeirra sem segja vestræna framkomu af því tagi hafa skaðleg áhrif á unglinga landsins.

Gwen Stefani færði að eigin sögn stóra fórn þegar hún kom kappklædd fram á tónleikum í Kula Lumpur á þriðjudag. Meðlimir andstöðuflokksins höfðu áður farið fram á að tónleikunum yrði aflýst af ótta við ögrandi framkomu söngkonunnar.

Nú er ráðgert að hin mjög svo kynþokkafulla Beyoncé Knowles haldi tónleika í landinu 1. nóvember næstkomandi. Skipuleggjendur tónleikanna haf sett sig í samband við umboðsmenn söngkonunnar og óskað eftir því að hún dragi úr ögrandi klæðaburði sínum.

"Beyoncé mun ekki getað haldið samskonar tónleika hér og hún heldur annars staðar," segir Razlan Ahmad Razlai í samtali við The Associated Press. "Við vitum að hún er vön að koma fram í efnislitlum fötum þar sem meðal annars sést í naflann en slíkt mundi ekki falla í kramið hér, segir Razlai. Það er þó ljóst að það dregur úr skemmtanagildinu, bættir hann við.

Samkvæmt leiðbeiningum yfirvalda í Malasíu skal kvenkynslistamaður klæðast fötum sem ná vel upp fyrir brjóst og niður fyrir hné. Eins skal hylja axlir. Listamenn mega auk þess ekki faðmast og kyssast á sviðinu og ekki má klæðast fötum með klámfengnum myndum né myndum af fíkniefnum.