Siggi stormur missti af blíðunni

„Ef menn vilja halda mér úti þá er það mér að meinalausu. Það þarf þá bara að safna í púkk svo ég geti verið hérna áfram,“ segir veðurfræðingurinn Sigurður Ragnarsson, gjarnan nefndur Siggi stormur, sem missti algjörlega af veðurblíðunni sem verið hefur víðast hvar á landinu síðustu tvær vikur.

Sigurður hefur verið staddur á sínu öðru heimili í Torrevieja á Spáni frá miðjum júní, eða einmitt frá þeim tíma sem góðviðriskaflinn hófst. Sigurður hafði í hyggju að snúa heim á ný á næstu dögum en viðurkennir að óskir um að hann héldi sig áfram á Spáni hafi borið á góma. Vilja gárungarnir meina að hann sé „óhappa“ og að gælunafnið stormur sé engin tilviljun. Sjálfur tekur hann sam­særiskenningunum með jafnaðargeði.

„Það er erfitt að halda því fram að rigningin fylgi mér því hér hefur verið brakandi blíða allan tímann,“ sagði Sigurður og hló dátt þegar Fréttablaðið bar málið undir hann. Hann kveðst þó ekkert svekktur yfir því að hafa misst af blíðunni og segist sannfærður um að hann eigi sjálfur eftir að upplifa langan góðviðriskafla síðar í sumar.

„Landinn er nú þannig að hann vill helst hafa vont veður á klakanum á meðan hann er sjálfur í útlöndum. Ég hef meira að segja fengið tölvupósta þar sem ég er beðinn um að spá rigningu heima á Íslandi. En ég er ekki svona, ef góða veðrið á Íslandi gleður landsmenn, þá er ég glaður.“