Litla hafmeyjan of lítil

Litla Hafmeyjan, þjóðartákn Dana, sem er staðsett við Langelinie, er of lítil, segir Peter Bech, eigandi kaffihúss á Langelinie. Hann hefur þess vegna afhjúpað nýja útgáfu af Hafmeyjunni á Langeliniekaj. „Aftur og aftur hef ég hitt fyrir ferðamenn sem verða vonsviknir þegar þeir sjá Litlu hafmeyjuna. Ég hugsaði því með mér að ég þyrfti að gera eitthvað í málinu," segir Peter.

Nýja styttan er yfir fjórir metrar á hæð, úr graníti og vegur 14 tonn. Peter segist sjálfur hafa hannað hana og þvertekur fyrir að hún sé nákvæm eftirmynd af eldri útgáfunni. Hann segir að fólk flykkist að til að sjá nýju styttuna og taka myndir af henni.