Libby getur ekki frestað afplánun

Dómari í Bandaríkjunum hefur úrskurðað að Lewis Libby geti ekki frestað fangelsisafplánun á meðan áfrýjunarferli er í gangi.

Úrskurðurinn þýðir að Libby gæti þurft að fara í fangelsi innan fárra vikna. Dómarinn hafnaði beiðni Libbys um að fá lausn á meðan á áfrýjun stæði, á þeirri forsendu að lögmanni Libbys hefði mistekist að sýna fram á að hann gæti fengið dómnum breytt. Lögmenn hans reyna að áfrýja þessari niðurstöðu.

Libby var sakfelldur í mars fyrir að ljúga að rannsóknarlögreglumönnum um hvað hann sagði blaðamönnum um CIA-njósnarann Valerie Plame. Nafni hennar var lekið til fjölmiðla árið 2003 í hefndarskyni fyrir gagnrýni eiginmanns hennar á innrásina í Írak. Enginn hefur verið ákærður fyrir lekann sjálfan.