Fimm fræknir læknanemar í Kenía

Fimm stúlkur sem stunda nám í læknisfræði í Háskóla Íslands dvelja nú í Kenía þar sem þær vinna hjálparstarf. „Við höfum verið að vinna á heilsugæslustöðvunum í Naíróbí,“ segir Helga Tryggvadóttir, ein hinna fimm fræknu.

„Verkefnin sem við fáum eru ýmisleg og við erum að hjálpa til við dagleg störf eins og til dæmis að bólusetja börn og fylgjast með fæðingum og ungbarnaeftirliti. Við höfum einnig fengið að taka þátt í svokölluðu „social service“ en þá er farið út í hverfin og fólk í neyð aðstoðað. Við fengum að fara með þegar einstæðar alnæmissmitaðar mæður voru heimsóttar en þær eru að sjálfsögðu mjög illa settar. Þær búa við hrikalegar aðstæður í kofum sem leka og engin rúm heldur notast þær við fleti á gólfinu. Þær eru náttúrlega ekki með neinar tekjur,“ segir Helga og augljóst að stelpunum hefur brugðið við að sjá ástandið.

„Það er alveg ólýsanlegt að sjá þetta og erfitt að ímynda sér hvernig sé að búa svona. Það er alltaf verið að nauðga stelpunum, engin sturta og enginn matur og á hverju götuhorni sér maður fíkniefnaneytendur að sniffa lím eða reykja hass.“ Að sögn Helgu hefur ferðin þó ekki einungis einkennst af eymd og erfiðleikum heldur hafa stelpurnar líka frá mörgu skemmtilegu að segja.

„Manni finnst það ótrúlegt en í borginni eru líka svaka flott hótel og þangað förum við og kælum okkur í sundlauginni og höfum það notalegt. Svo er mjög gaman að keyra út fyrir borgina þar sem eru dýr úti um allt og sebra­hestar við veginn eins og kindurnar á Íslandi. Við fórum líka og sáum munaðarlausa fíla sem var mjög skemmtilegt,“ segir Helga en þær stelpur eru nú á leiðinni í ferðalag um landið þar sem þær lenda vafalaust í ýmsum skemmtilegum uppákomum.