Miklu erfiðara að horfa á fíflalætin

Það urðu þau Sara Hrund Gunnlaugsdóttir, Eiríkur Rósberg Eiríksson og Hallur Örn Guðjónsson sem stóðu uppi sem sigurvegarar í þáttunum Leitin sem lauk á Stöð 2 í gærkvöldi.

Auðunn Blöndal, Sveppi og Pétur Jóhann lögðu af stað með þáttaröðina í upphafi til að koma auga á mögulega arftaka sína og munu þremenningarnir fá eigin þátt á sjónvarpsstöðinni Sirkus sem tekinn verður til sýninga í haust.

„Við náum vel saman og höfum húmor fyrir hvort öðru. Við erum líka gífurlega ólík svo ég vona að útkoman verði góð,” segir Sara, en hún var önnur af tveimur stúlkum sem komust í 12-manna lokahópinn en sú eina sem náði alla leið. „Ég er rosa ánægð því aldrei nokkurn tíma átti ég von á að ná svona langt. Ég bjóst ekki einu sinni við því að komast í gegnum áheyrnarprufurnar,” segir Sara.

Henni bíður það verkefni að halda uppi heiðri kvenþjóðarinnar í sjónvarpsþætti sem snýst um fíflalæti, en hann hefur göngu sína á sjónvarpsstöðinni Sirkus í haust. Engin endanleg mynd er hins vegar komin á þáttinn. Sara segir að þau þrjú séu óðum að venjast myndavélunum og hlakki mikið til þess að sprella vikulega fyrir framan myndavélarnar. „Það ekkert mál að vera með fíflalæti fyrir framan myndavélarnar. Það er hins vegar miklu erfiðara að horfa á útkomuna.“