Skáldin guggnuðu á bátnum

"Við lentum því miður á bát sem hafði aldrei áður verið róið á. Hann var ekki þannig búinn að við næðum okkar besta hraða og þær færeysku höfðu því betur sem fyrr," segir Egill Örn Jóhannsson, framkvæmdastjóri bókaútgáfunnar JPV, sem þurfti ásamt liði sínu að láta í minnipokann fyrir færeyska saumaklúbbnum Stokkarnir í hinni árlegu róðrakeppni sem haldin er á sjómannadaginn.

Egill og félgar í JPV náðu þó ágætis tíma, tvær mínútur og níu sekúndur. En það dugði ekki til. Færeyski saumaklúbburinn var tuttugu sekúndum á undan.

Lið JPV átti upphaflega að vera skipað skáldum en svo fór að aðeins eitt mætti til leiks, Hugleikur Dagsson. "Skáldin guggnuðu á bátnum þannig að við þurftum að reiða okkur á eigin starfsmenn sem var í fínu lagi. Við áttum sigurinn vísan þar til við fengum vitlausan bát," segir Egill Örn. Þó var valinn maður í hverju rúmi hjá JPV. Auk Hugleiks og Dags réri Hrafn Margeirsson, fyrrverandi landsliðsmarkvörður, þýski ljósmyndarinn Torstenn Henn, Kristín Gunnarsdóttir, Ýr Gísladóttir og Anna Guðrún, sem allar starfa hjá útgáfufyrirtækinu. Sú síðast nefnda hreppti þó stýrmannshlutverkið.

Egill hefur þó síður en svo lagt árar í bát þótt keppnin hafi ekki farið eins og hann óskaði sér. "Við mætum tvíefld til leiks á næsta ári og hefjum stífar æfingar í sumar," segir Egill Örn sem hefur ekki enn náð að landa róðrabikarnum eftirsótta.