Framsóknarmenn missa sig í ræðustól á Klörubar

„Ef einhver heldur ennþá, að hér sé um grín að ræða eða þá að menn séu bara að fá sér einn léttan er það hinn mesti misskilningur. Sjaldgæfara er að menn fái sér bjór, heldur en kaffi eða vatn, enda er fólk saman komið til þess að rökræða um pólitík," segir Sturla S. Þórðarson sem búsettur er úti á Kanaríeyjum. Vikulega gengst hann fyrir stjórnmálafundum á Klörubar og segir hann miklu meira fjör í stjórnmálaumræðunni þar en á Íslandi.

Framsóknarmenn eru hlutfallslega miklu fleiri á Kanaríeyjum en á Íslandi. Þeir fylgjast vel með og lýst ekki á blikuna sé horft til skoðanakannana. "Hér er mikið fjör í pólitíkinni alla vega meira fjör á framsóknarfundum hér en heima," segir Sturla sem er í stöðugu sambandi við forystu flokksins - sem nú horfir suður á bóginn og veltir fyrir sér þessari óvæntu vakningu á sólarströndinni.

Samtals hafa nú yfir 2.000 manns mætt á þessa fundi frá því að þeir hófust 21. október 2006. Á nýjustu fundina, 10. mars og 17. mars mættu, á fyrri fundinn 170 manns og á þann síðari 240.

"Á báðum fundunum voru skoðaðir möguleikar á

nýjum ríkisstjórnum og ég sagði fundarmönnum mína skoðun á því, hvernig ástand yrði heima, ef kæmi vinstri stjórn! Stöðnun, jú, hún mundi hefjast að sjálfsögðu á landsbyggðinni, þar kæmi fyrr atvinnuleysi. Framsókn er eini flokkurinn á Íslandi sem hefur haft umhverfis- og náttúrverndarmál á sinni stefnuskrá frá stofnun flokksins!"

Fréttablaðið greindi frá því fyrir skemmstu að metaðsókn var á fund framsóknarmanna á Klörubar þegar Guðni Ágústsson landbúnaðarráðherra mætti á staðinn eða 360 manns. Ísólfur Gylfi Pálmason var gestur þar fyrri skemmstu og von er á Hauki Halldórssyni, fyrrverandi formaður stéttasambands bænda. Sturla gerir sér vonir um góða mætingu þá enda mjög margir bændur sem hafa vetursetu á Kanaríeyjum.

Sturla segir mikla alvöru á bak við oft bráðskemmtilegar ræður, og jafnvel hefur komið fyrir, að fólk hefur orðið svo æst, að þurft hefur að víkja því úr ræðustóli.

"Ég vil taka það fram, að það er vegna pólitískra hitamála og menn missa sig stundum í að nota óviðeigandi orðalag. Að sjálfsögðu er hér mikið af eldra fólki og öryrkjum, sem hafa mikilla hagsmuna að gæta. Okkur hér finnst fyrir neðan allar hellur að geta ekki kosið hér í maíkosningunum nema að fara í dagsferð til Las Palmas. Bráðnauðsynlegt er að flytja kjörkassa niður á ensku ströndina, þar sem allir Íslendingarnir eru."