Plútó víkur fyrir Eres

Fyrrum reikistjarnan Plútó þarf nú að þola enn eina niðurlæginguna. Ekki er nóg með að æðstaráð stjörnufræðinga hafi á síðasta ári útilokað hnöttinn frá samfélagi reikistjarna og skilgreint hann sem dvergstjörnu, heldur er nú ljóst að Plútó er ekki einu sinni stærsta dvergstjarnan í sólkerfinu.

Þegar Plútó var skilgreind upp á nýtt og flokkur dvergstjarna búinn til hlaut Plútó umsvifalaust æðsta sess í þeim flokki. Nú er ekki vitað betur en að Eres nokkur sé stærsta dvergstjarna sólkerfisins.

Það var stjörnufræðingurinn Michael E. Brown og nemendur hans sem komust að þessari niðurstöðu við skoðanir á Dysnomia, tungli Eresar. Með hjálp Hubble-stjörnusjónaukans tókst þeim að reikna út massa Eresar. Og samkvæmt útreikningum þeirra er hann 27 prósent meiri en massi Plútós. Eres er því níundi stærsti hluturinn í sólkerfinu.

Eres þessi er hreint ekki í seilingarfjarlægð. Hún er með allra ystu hlutum sem ganga á braut um sólina. Nánar til tekið er Eres staðsett handan Kuiper-beltisins á hinum svokallaða Dreifða diski sem enn er lítið vitað um. Eres var uppgötvuð árið 2005 og hefur fengið óskipta athygli stjörnuathuganafólk síðan þá. Vegna stærðar sinnar og tungls síns Dysnomia vilja sumir kalla hana tíundu reikistjörnu sólkerfisins. Eres er nefndur eftir grískri andagyðju.