Stjórnarskrárdeilu slegið á frest

Brussel Á tveggja daga leiðtogafundi Evrópusambandsins, sem hófst í Brussel í gær, liggur fyrir að ákveðið verði að framlengja um eitt ár til viðbótar "íhugunarhlé" það sem leiðtogarnir gáfu sér fyrir ári til að ræða hvað gera skyldi eftir að fullgilding stjórnarskrársáttmála sambandsins strandaði í þjóðaratkvæðagreiðslum í Frakklandi og Hollandi.

Með því að slá því þannig frekar á frest að ákveða hvað gera skuli í málinu er Frökkum og Hollendingum gefið færi á að fjalla um það upp á nýtt, enda fara fram þingkosningar í báðum löndum að ári og forsetakosningar að auki í Frakklandi.

Jose Manuel Barroso, forseti framkvæmdastjórnar ESB, sagðist í gær óttast að eitt viðbótarár "íhugunar" kynni að verða tólf mánuðir skotgrafakarps um mál sem skipti sköpum fyrir framtíð sambandsins.

Hann hvatti ESB-leiðtogana þess í stað til að nota næstu tólf mánuði til að beita sér með virkum hætti fyrir því að finna lausn á vandanum og sýna með því borgurunum að Evrópusambandið skipti þá máli og þeir skirrtust ekki við að finna svör við áhyggjuefnum þeirra. Barroso hvatti "öll stjórnmálaöfl í Evrópu til að vinna saman að því að komast út úr þessari núverandi "Evrópusvartsýni"."

Wolfgang Schüssel, kanslari Austurríkis sem nú er að ljúka ESB-formennskumisseri sínu, sagði við upphaf fundarins að hann vonaðist til að niðurstaða fengist í stjórnarskrármálið "í síðasta lagi á síðari helmingi ársins 2008". Hann gaf til kynna að hann vænti tillagna um málið frá Frökkum og Hollendingum á næstu mánuðum.

Þar sem samkomulagi um stjórnarskrársáttmálann verður slegið á frest munu leiðtogarnir einbeita sér að öðrum málum, ekki síst því hvernig hægt sé að efla samstarf á tilteknum sviðum óháð því hvort nýi sáttmálinn taki gildi, og málefnum tengdum frekari stækkun sambandsins. Þar er fókusinn ekki síst á hæfni ESB til að taka fleiri ríki inn í sínar raðir.

Óánægja meðal kjósenda í eldri aðildarríkjunum, ekki síst Frakklandi, með afleiðingar þess að taka fátæk og tiltölulega vanþróuð ríki inn í sambandið - ótti við straum ódýrs vinnuafls frá þessum löndum er dæmigerður fyrir slíka óánægju - hefur kallað á að leiðtogar ESB sýni að þeir taki þessi áhyggjuefni borgaranna alvarlega.

Anders Fogh Rasmussen, forsætisráðherra Danmerkur, sagði við komu sína til Brussel að hann væri ánægður með að "borgara­náin" mál á borð við gegnsæi í ákvarðanatöku og orkumál yrðu ofarlega á dagskrá leiðtoganna að þessu sinni.