Chelsea úr leik

Barcelona er komið áfram í 8-liða úrslit Meistaradeildar Evrópu eftir að liðið gerði 1-1 jafntefli við Chelsea á heimavelli sínum. Snillingurinn Ronaldinho skoraði mark Barcelona, en Frank Lampard jafnaði metin fyrir Chelsea úr vafasamri vítaspyrnu í uppbótartíma. Barcelona fer því áfram samanlagt 3-2.

Juventus er sömuleiðis komið áfram í næstu umferð eftir að liðið lagði Werder Bremen 2-1 á heimavelli og fer liðið áfram á fleiri mörkum skoruðum á útivelli. Gestirnir í Bremen voru yfir lengst af leik, en sigurmark Juventus skoraði Brasilíumaðurinn Emerson eftir fáránleg mistök markvarðar þýska liðsins.

Spænska liðið Villareal er einnig komið áfram eftir að liðið gerði 1-1 jafntefli við Glasgow Rangers á heimavelli sínum og er komið áfram á fleiri mörkum skoruðum á útivelli.