Wenger ósáttur við tapið

Arsene Wenger, knattspyrnustjóri Arsenal, var ekki sáttur við tap sinna manna gegn Blackburn í úrvalsdeildinni í dag og taldi sitt lið eiga meira skilið úr leiknum. Blackburn komst upp fyrir Arsenal í fimmta sæti deildarinnar með sigrinum.

"Ég er mjög dapur yfir þessum úrslitum því mér fannst við alls ekki eiga skilið að tapa þessum leik. Að undanskildum fimm mínútum í fyrri hálfleiknum fannst mér við ráða ferðinni algjörlega en náðum ekki að skora. Það skrifast ef til vill á það að við vorum að spila erfiðan leik í meistaradeildinni í vikunni, en mínir menn börðust samt vel allan leikinn," sagði Wenger.