Með verstu áhrifin

Dómarinn harðskeytti og maðurinn á bak við Idol og X-Factor, Simon Cowell, hefur verið kjörinn sá aðili sem hefur haft verst áhrif á breskt tónlistarlíf undanfarin tuttugu ár.

Cowell hefur látið hafa eftir sér að hann hlusti aldrei á tónlist og telja margir að hann hafi bara áhuga á því sem seljist en ekki góðu lagi. Hefur hann komið fjölmörgum ungum söngvurum á framfæri eftir að þeir slógu í gegn í þáttum hans, við misjafnar undirtektir.

Í öðru sæti í skoðanakönnuninni, sem var framkvæmd af eMusic, voru lagasmiðirnir Stock, Aitken og Waterman, sem eru mennirnir á bak við þekkt lög sem Rick Astley og Kylie Minogue sungu á árum áður.

Útvarpsmaðurinn John Peel, sem lést á árinu, var í efsta sæti yfir þá sem hafa haft bestu áhrifin á breskt tónlistarlíf undanfarin tuttugu ár. Í næstu sætum á eftir komu Jools Holland og Michael Eavis.