Hefði aðeins geta skorað þetta mark gegn Englendingum

Knattspyrnugoðsögnin Diego Maradona sagði í nýlegri heimildarmynd sem sýnd verður á BBC, að draumamarkið sem hann skoraði gegn Englendingum á HM í Mexíkó árið 1986, hefði ekki geta komið gegn neinu öðru liði en því enska. Hann útskýrði líka sína hlið á hinni alræmdu "hönd Guðs."

Argentínumenn unnu þennan sögufræga leik 2-1 og enduðu á því að vinna mótið. Fyrra mark Maradona var eitt það alræmdasta í sögu keppninnar, en það síðara líklega glæsilegasta mark allra tíma. Fyrra markið kom eftir að Maradona notaði "hönd Guðs" til að koma boltanum framhjá Peter Shilton í marki Englendinga, en það síðara eftir að hann lék á hálft enska liðið frá sínum eigin vallarhelmingi og skoraði.

"Ég hefði aldrei skorað þetta mark gegn öðru liði en því enska. Ef þetta hefði verið gegn Brasilíu, Úrúgvæ eða Ítalíu, hefði ég verið sparkaður niður með fólskubrögðum. Englendingarnir eru hinsvegar ekki þannig. Þeir eru heiðursmenn á velli og göfugri en það að beita slíkum brögðum," sagði Maradona og útskýrði enn og aftur atvikið þar sem hann skoraði með höndinni.

"Jú, ég skoraði með höndinni - ég viðurkenni það, en ég vil ekki kalla það að svindla. Ég vil frekar kjósa þetta útsjónarsemi eða prakkaraskap en svindl. Það er einfaldlega munur á því hvernig litið er á svona atvik í Suður-Ameríku eða á Englandi, en ég skoraði áður með höndinni fyrir Argentínu. Ég kallaði þetta hönd Guðs því það er Guð sem gefur okkur hendurnar og úr því að tveir menn (dómari og línuvörður) sáu ekki atvikið - hlaut þetta að vera hönd Guðs," sagði Maradona.