365 þúsund Írakar á vergangi

Mörg þúsund Írakar flýja nú heimaland sitt á degi hverjum. Flóttamannahjálp Sameinuðu þjóðanna segir þetta stöðuga og lágværa brottflutninga. Þeim Írökum sem leita hælis á Vesturlöndum fjölgi dag frá degi. Auk alls þessa séu 365 þúsund Írakar á vergangi og þeir verði aðeins fleiri eftir því sem á líði.

Fréttavefur BBC greinir frá þessu. Fyrr í þessari viku greindu stjórnvöld í höfuðborginni, Bagdad, frá því að um 300 þúsund Írakar hefðu þurft að hverfa frá heimilum sínum síðan í febrúar á þessu ári. Það var þá sem helgidómur sjía múslima í bænum Samarra eyðilagðist í sprengjuárás og er herskáum súnní múslimum kennt um.

Flóttamannahjálp Sameinuðu þjóðanna hefur hingað til lagt áherslu á að hjálpa brottfluttum Írökum við að flytja aftur til heimalandsins og flóttamönnum af öðrum þjóðernum sem hafi orðið innlyksa í landinu. Verkefnið sé nú annað, það er að hjálpa fólki á vergangi og þeim sem vilji flýja skálmöldina í Írak og leita tækfæra í öðrum löndum.

Flóttamannahjálpin segir að í fyrra hafi 50 þúsund Írakar snúið heim frá nágrannalöndum. Það sem af sé þessu ári hafi aðeins þúsund manns leitað aftur heim til Íraks. Talsmaður Flóttamannahjálparinnar segir samtökin fylgjast meðal annars með landamærunum að Sýrlandi. Þar fari um tvo þúsund manns yfir daglega þannig að ætla megi að um 40 þúsund Írakar fari þangað í hverjum mánuði. Írakar fara einni til Jórdaníu, Tyrklands, Líbanons, Egyptalands og síðan til Evrópulanda en af flóttamönnum þangað í ár eru Írakar sagðir lang fjölmennastir.

Sameinuðu þjóðirnar áætla að um 50 þúsund Írakar þurfi að hverfa frá heimilum sínum í hverjum mánuði. Margir þeirra haldi þó enn til í Írak. Áætlað er að um milljón Írakar búi nú í Jórdaníu og Sýrlandi. Margir þeirra fluttu þangað í valdatíð Saddams Hússeins, fyrrverandi Íraksforseta, og hafa búið þar í rúman áratug, en fjölmargir hafi flutt þangað eftir að Saddam var steypt af stóli árið 2003.