Þróa nýtt lyf við astma

Allt útlit er fyrir að nýtt lyf við astma komi á markað innan fárra ára. Þróun lyfsins er komin langt á veg en lyfið hefur jákvæð áhrif á bólguþátt sem tengist astma en er þó ekki steralyf. Íslensk erfðagreining hóf lyfjaprófanir á tilraunalyfi við astma í maí 2005 í samstarfi við erlent lyfjafyrirtæki sem upphaflega þróaði lyfið við öðrum sjúkdómi.

Lyfið, sem kallast CEP-1347, hefur áhrif á meingen sem vísindamenn íslenskrar erfðagreiningar hafa sýnt fram á að gegnir mikilvægu hlutverki í myndun astma. 160 sjúklingar tóku þátt í prófunum Íslenskrar erfðagreiningar og eru helstu niðurstöður þær að lyfið virðist öruggt og þolast vel og hafði meðal annars jákvæð áhrif á bólguþátt sem tengist alvarleika astma og bólgum í líkamanum.

Astmi er algengasti langvinni sjúkdómurinn í börnum og ungu fólki og er tíðni hans í iðnvæddum löndum á bilinu 10-30 prósent. Sjúkdómurinn er langvinnur bólgusjúkdómur í lungum og öndunarfærum og orsakast af óeðlilegu og ýktu svari ónæmiskerfisins við utanaðkomandi áreiti. Hjá sumum sjúklingum einkennist sjúkdómurinn af tiltölulega mildum hósta en í alvarlegri tilfellum geta astmaköst verið lífshættuleg því öndunarvegurinn lokast nær alveg.

Virkasta meðferðin við astma fram að þessu hefur verið notkun steralyfja. Þau geta hins vegar valdið alvarlegum aukaverkunum og hefur eitt helsta markmið nýrra meðferðarúrræða við astma verið að finna leiðir til að minnka bólgur í öndunarvegi án notkunar steralyfja. Niðurstöðurnar nú benda til þess CEP-1347 gæti verið lausnin sem menn hafa leitað að.