Nýjar ákærur hugsanlegar í Baugsmálinu

Ekki er útilokað að von sé á nýjum ákærum í Baugsmálinu, eftir að Jón Ásgeir Jóhannesson, forstjóri fyrirtækisins, fékk boð um að mæta í yfirheyrslur hjá Ríkislögreglustjóra í næstu viku. Málflutningur í Baugsmálinu fór fram í Hérðasdómi Reykjavíkur í dag.

Þau óvæntu tíðindi bárust í Héraðsdómi Reykjavíkur í dag, að Jón Ásgeir Jóhannesson, forstjóri Baugs, hefði verið boðaður til yfirheyrslu hjá Ríkislögreglustjóra á miðvikudaginn í næstu viku vegna meintra skattalagabrota. Það var Gestur Jónsson, verjandi Jóns Ásgeirs, sem greindi frá þessu í málflutningi sínum fyrir dómnum. Gestur sagði að hinn meintu brot varði skattalög, bókhald og ársreikninga. Boðun Jóns Ásgeirs til yfirheyrslu hefði komið fram eftir að skattrannsóknarstjóri sendi ríkislögreglustjóra niðurstöður vegna skattamála Baugs, Gaums og Fjárfars, sem allt eru félög sem Jón Ásgeir hefur farið fyrir. Jón BH Snorrason, yfirmaður efnahagsbrotadeildar Ríkislögreglustjóra, staðfesti við NFS að hér væri í raun um nýtt mál að ræða, jafnvel þótt það ætti rætur í fyrri rannsókn. Fyrir um ári hefði ríkisskattstjóraembættið sent lögreglunni ábendingu um atriði sem skoða þyrfti betur.

Sigurður Tómas Magnússon, settur saksóknari í Baugsmálinu, færði rök fyrir því í morgun að kaup Baugs á Vöruveltunni, sem átti 10-11 búðirnar, væru tæk til efnislegrar meðferðar fyrir dómi. Ákæruvaldið sakar Jón Ásgeir Jóhannesson, forstjóra Baugs, um að hafa verið báðum megin borðs við sölu Vöruveltunnar til Baugs og leynt stjórn Baugs þeirri staðreynd að hann væri eigandi Vöruveltunnar. Hann hafi því notað aðstöðu sína til að stunda viðskiptahætti sem ekki standist lög um innherjaviðskipti. Baugur keypti á sínum tíma 70 prósenta hlut í Vöruveltunni. Í upphafi málflutnings í morgun lagði Sigurður Tómas fram skjal um vinnu Deloitte og Túsch endurskoðunarfyrirtækisins, sem hann segir að skýri að hluta hvers vegna rannsókn málsins dróst. En verjendur Baugsfjölskyldunnar hafa gagnrýnt hvað rannsókn málsins tók langan tíma. Gestur Jónsson sagði ekki koma fram í ákærunni hvert brotið væri og tugir staðreyndavillna væru í ákæruskjalinu og fór fram á að þessu atriði ákærunnar yrði vísað frá dómi.