Hafró varar við kræklingatínslu víða um land

Hafrannsóknarstofnun varar fólk eindregið við því að tína sér krækling eða annan skelfisk til matar í Hvalfirði vegna gríðarlegs magns eiturþörunga í sjónum þar. Einnig er varað við því að tína skelfisk í nágrenni Stykkishólms og í Eyjafirði.

Magn eitraðra skoruþörunga af dinophysis-ættkvísl mælist nú hátt í 24 þúsund frumur í lítra af sjó í Hvalfirði. Viðmiðunarmörk eru 500 frumur í lítra af sjó og sýna mælingarnar nú því rúmlega 47-falt hættumagn.

Hafsteinn Guðfinnsson, sérfræðingur hjá vistfræðisviði Hafrannsóknastofnunar segir óvenjulegt að sjá svona mikið magn þörunganna svo snemma sumars, þeir komi yfirleitt frekar fram seinna sumars. Hann segir ekki ljóst hvaða ástæður liggi að baki en segir þó líklegast að þetta komi til vegna utanaðkomandi aðstæðna, svo sem lagskiptingar sjávar eða góðs næringarframboðs fyrir þörungana. Hann telur ólíklegt að mengun eða hlýnun sjávar valdi fjölgun eiturþörunganna.

Hafrannsóknastofnun mun fylgjast með magni eiturþörunga í Hvalfirði sem og á Breiðafirði og Eyjafirði. Á heimasíðu hafrannsóknastofnunar er tengill þar sem hægt er að fylgast með niðurstöðum og því hvenær verður hægt að borða skelfiskinn aftur. Hafsteinn segir ekki hægt að treysta þumalputtareglunni um að öruggt sé að tína skelfisk í mánuðum sem hafa R í nafni sínu, því í fyrra hafi eiturþörungar mælst yfir hættustigi langt fram í desember. Það er því vissara að aðgæta heimasíðuna hafro.is áður en farið er á kræklingafjöru.