Bökuðu kjarnorkuköku

Háskólastúdentar í Íran fögnuðu fæðingardegi Múhameðs spámanns í dag með því að baka gula kjarnorkuköku. Með bakstrinum vilja nemendurnir sýna í verki stuðning sinn við stjórnvöld í Íran. Nemendur við Amir Kabir háskólann í Tehran fóru ekki svangir heim í morgun, enda kakan góða engin smásmíð. Tilefni bakstursins er tilkynning Íransstjórnar um árangur vísindamanna í auðgun úrans og það er ekki að ástæðulausu að hún er gul. Og sumir fögnuðu líka ummælum forsetans Mahmoud Ahmedinajad um að það ætti að þurrka Ísrael út af landakortinu. Ráðamenn í Íran eiga sér ekki marga bandamenn utan landmæra landsins. En viðtökurnar við gulu kökunni sýna svo ekki verður um villst að unga kynslóðin í Íran stendur heilshugar við bakið á þeim.