Við vorum betri síðustu 20 mínúturnar

Sir Alex Ferguson knattspyrnustjóri Man Utd er í skýjunum með sigur sinna manna á Liverpool í stórleik helgarinnar í enska fótboltanum. Rio Ferdinand skoraði sigurmark heimamanna á 90. mínútu á Old Trafford í dag. Hann segir sigurinn verðskuldaðan.

"Það er alltaf frábær tilfinning þegar sigurmarkið kemur svona seint. Liverpool er ofboðslega sterkt lið og erfitt að eiga við. Þegar tvö svona sterk lið eigast við í jafn mikilvægum leik og þessi var þá getur verið erfitt að skora. En okkur fannst við búa yfir nægum gæðum og sérstaklega í ljósi þess að við vorum betri síðustu 20 mínúturnar þá áttum við sigurinn skilið." sagði Sir Alex í sjöunda himni eftir leikinn.