Kennir óvinum sínum um ósigurinn í Eurovision

„Ég er það besta sem hefur hent þessa djöfuls keppni,“ sagði Silvía Nótt við evrópska fjölmiðla eftir að ljóst var að hún kæmist ekki í aðalkeppnina í Eurovision.

„Þið ljótu skepnur. Þið kjósið forljóta Finna, sem eru ekki einu sinni með alvöru förðunarfræðinga. Þið völduð ekki mig af því að ég er ekki dræsa frá Hollandi og ekki djöfulsljót tík frá Svíþjóð,“ öskraði Silvía í gegnum tárið í ríflega tíu kvikmyndavélar auk sinna eigin.

„Drulliði ykkur í burtu,“ vældi íslenska ofurstjarnan og strunsaði útgrátin til Rómaríó sem reyndi að róa hana. Aðdáandi kallaði til hennar: „Silvía, Ísland elskar þig. Ísland elskar þig Silvía.“

Spurð af Fréttablaðinu af hverju hún teldi að Evrópa hefði hafnaði henni svaraði hún: „Láttu mig vera. Ég vil fá pabba minn. Ég vil fara heim til pabba.“ Fleiri aðdáendur kölluðu á eftir henni: „Þú ert yndisleg. Þú ert sú besta.“ Rómaríó reyndi að róa stjörnuna og sagði henni að án hennar væri hann ekkert.

Silvía sagði að hún hefði verið borin rógi: „Það hefur einhver drusla verið að tala illa um mig. Það halda allir að ég sé einhver tík og ég er ekki tík.“

Hún vildi ekki viðurkenna að púað hefði verið á hana í höllinni á fimmtudaginn. „Það hefur einhver verið að ljúga því.“ Spurð hver yrðu næstu skref hennar svaraði hún í gegnum tárin:

„Ég ætla að fara á annan stað, þar sem er eitthvað að fólki með heila, skilurðu. Ég ætla að fara til Ameríku þar sem ég á fullt af frægum vinum og þar sem ég ætla að gera nýja plötu með Silvíu Night. Ógeðslega töff plötu fyrir alla sem eru töff, en ekki fyrir einhverja júrótrass-lúða í buffalo-skóm, því þeir vita ekki einu sinni hvað er töff, skiluru.“

Silvía hefur aldrei staðið sig betur á sviðinu í Aþenu en hún gerði í fyrrakvöld. Svo virtist sem púið í byrjun lagsins hafi styrkt hana. Grikkirnir hafa hins vegar ekki fyrirgefið henni fyrir að hafa í þrígang blótað á fyrstu æfingunni, þar sem hún sagði meðal annars sviðsmanni að fara til fjandans.

Fjölmiðlar í Grikklandi greindu síðan frá því að hún hefði sagt það við grísku þjóðina. Einnig náðist á myndband þar sem Rómaríó sagði við Silvíu, þar sem hann bar hana út í bíl af skemmtistað í Aþenu, að þau ættu að drífa sig burt frá þessu ljóta gríska fólki. Rómaríó Estevez og Pepe Luigi voru látnir svara fyrir það á grískri sjónvarpsstöð.

- gag@frettabladid.is