Þurfti nýtt blóð

Bob Rock, fyrrverandi upptökustjóri Metallica, líður eins og hann sé tuttugu árum yngri eftir að hann sagði skilið við sveitina fyrr á þessu ári.

Líf mitt snýst núna um eiginkonu mína og börnin og upptökur fyrir aðrar hljómsveitir, sagði Rock, sem fyrst vann fyrir Metallica á samnefndri plötu árið 1991.

Eftir útgáfu heimildarmyndarinnar Metallica: Some Kind of Monster kröfðust aðdáendur sveitarinnar þess að Rock yrði sagt upp. Töldu þeir hann hafa of mikil áhrif á hljóm sveitarinnar. Rock sárnaði mjög sú umræða. Gagnrýnin kom sér illa fyrir börnin mín, sem lásu hana en skildu ekki kringumstæðurnar. Stundum, jafnvel með frábærum þjálfara, halda lið áfram að tapa. Þá þarf að fá nýtt blóð inn, sagði hann.

Upptökustjóri á næstu plötu Metallica verður Rick Rubin, sem hefur m.a. unnið með Red Hot Chili Peppers og Johnny Cash. Næstu verkefni Rubins eru aftur á móti nýjar plötur frá Michael Buble, Simple Plan og Offspring.