Tóku mann í gíslingu á hamborgarastað

Talsvert uppnám skapaðist þegar tveir vopnaðir menn tóku þann þriðja í gíslingu á veitingastað í miðborg Istanbúl í gær.

Að sögn sjónarvotta birtust byssumennirnir allt í einu á Burger King veitingastað í miðborginni, létu ófriðlega og tóku einn viðskiptavininni í gíslingu. Ekkert er vitað um ástæður verknaðarins en þeir voru íklæddir bolum sem á var letrað Tyrkland og virtust vera um tvítugt. Eftir samningaviðræður við lögregluna féllust þeir á að láta gísl sinn lausan.

Nokkru síðar færði annar gíslatökumannanna sig upp á þak þar sem hann hélt byssu sinni að höfði sér og hrópaði: „Ég vil verða píslarvottur." Félagi hans hélt sig hins vegar innandyra, reiðubúinn að svipta sig lífi. Lögreglan réðst að lokum til inngöngu og tók báða mennina fasta áður en þeir náðu að skaða sig og aðra viðstadda. Talsverður mannfjöldi safnaðist saman við veitingahúsin og fagnaði hann ákaft þegar málið hafði verið til lykta leitt.