Podolski á leið til Bayern Munchen

Skærasta framtíðarstjarna Þjóðverja, hinn tvítugi sóknarmaður, Lukas Podolski er á leið til nýbakaðra meistara Bayern Munchen. Uli Höness, stjórnarformaður Bayern sem tryggði sér Þýskalandsmeistaratitilinn í gær segist í viðtali við þýska fjölmiðla í dag hafa náð samkomulagi við leikmanninn.

Podolski sem leikur með Köln er ein af vonarstjörnum þýska landsliðsins fyrir HM í sumar og Höness hefur náð samkomulagi við leikmanninn. "Ef hann kemur ekki til okkar í sumar þá kemur hann alla vega á næsta ári." sagði Höness.

Podolski skoraði 10 mörk fyrir Köln í Bundesligunni fyrir tveimur árum en það er met fyrir 18 ára leikmann í deildinni. Podolski segir í viðtali við dagblaðið Cologne daily Express að hann sé tilbúinn að takast á við áskorunina og hræðist ekki samkeppni í liðinu við stjörnur á borð við Roy Makaay og Claudio Pizarro.

"Ég efast ekki um að ég hef tekið rétta ákvörðun. Ég hræðist ekki það að fá ekki að spila" sagði hinn tvítugi sóknarmaður.