Sendir bandaríska sendiráðinu kvörtun

Mannréttindamál Margrét Steinarsdóttir, lögfræðingur Alþjóðahúss hyggst senda kvörtun til bandaríska sendiráðsins vegna skýrslu sendiráðsins um mansal hér á landi þar sem trúnaðarupplýsingar frá Alþjóðahúsi koma fram. Ég er mjög ósátt við hvernig það sem ég sagði var tekið úr samhengi og að það skuli vera vísað í mig, því þó að ég sé ekki nafngreind þá er bara einn lögfræðingur í Alþjóðahúsi og augljóst við hvern er átt, segir Margrét.

Margrét segir að starfsfólk Alþjóðahúss vilji sjálft fá að ráða því hvaða upplýsingar frá Alþjóðahúsi fari í fjölmiðla. Við höfum alltaf varast það að senda nokkuð frá okkur sem gæti rýrt traust þeirra sem til okkar koma á okkur.

Hingað til hefur ekki komið fram í skýrslum bandaríska sendiráðsins hvaðan trúnaðarupplýsingar koma að sögn Margrétar. Ég hef tvisvar áður gefið bandaríska sendiráðinu upplýsingar og í þau skipti var skýrslan sett þannig fram að það var ekki hægt að sjá hver það var sem gaf upplýsingarnar, segir hún.