Britney komin með nýjan

Söngkonan Britney Spears sást á dögunum með nýjum manni. Ekki er langt síðan að Britney skildi við rapparann Kevin Federline, eiginmann sinn til tveggja ára, en með honum á hún tvö börn. Undanfarnar vikur hefur Britney verið mikið í fréttum, þá aðallega fyrir tryllingsleg drykkjulæti ásamt nýrri vinkonu sinni, Paris Hilton.

Fyrir skömmu sást poppdívan Britney Spears með nýjan mann sér við hlið, en er það dagblaðið The New York Post sem greinir frá þessu. Maðurinn heitir Jonathan „JR" Rotem og er hann. Jonathan og Britney sáust leiðast saman í verslunarmiðstöðinni The Grove, en þar héldust þau hönd í hönd, fóru í bíó og gengu svo saman inn á öldurhús.

Viðstaddir segja að Britney hafi setið í kjöltu Jonathans og látið vel að honum. „Þau sátu saman og voru ástleitin á svip. Ég gat ekki betur séð en þau væru afar ástfanginn," segir ónefndur heimildamaður The New York Post. Jonathan þessi er talsvert virtari listamaður en fyrrverandi eiginmaður Spears og hefur hann unnið með mönnum á borð við Snoop Dogg, Dr. Dre, The Game, Destiny's Child og Britney sjálfri. Hann fæddist í Suður Afríku og ungur að aldri snéri hann sér að tónlist.

Í dag á hann eigið útgáfu fyrirtæki, Beluga Heights sem staðsett er í Los Angeles. Jonathan þessi er af mörgum talinn einn heitasti hiphop- taktframleiðandinn í bransanum í dag og er hann á hraðri uppleið. Ekkert hefur enn fengist staðfest í þessum fréttum, en hvorki Britney né Jonathan hafa tjáð sig um málið við fjölmiðla.

Nýlega kom Kevin Federline fram í viðtali og sagði þar að hann væri algjörlega kominn yfir Britney og að honum stæði á sama hvort hún fyndi sér annan mann eða ekki. Federline sjálfur hefur ekki verið bendlaður við aðra konu síðan hann skildi við Britney, að undanskilinni klámmyndastjörnunni Kendru Jade, en seinna neitaði hún öllum kynferðislegum tengslum við rapparann.