Lindsay sökuð um ritsóðahátt

Ungstirnið Lindsey Lohan vísar gagnrýni um barnalegt málfar og stafsetningu í kveðju til minningar um leikstjórann Robert Altman til föðurhúsanna. Hún segir að stafsetningavillur skipti ekki máli þar sem kveðjan hafi verið skrifuð frá hjartanu.

Altman lést hinn 20. nóvember síðastliðinn en Lohan lék í síðustu mynd hans A Prairy Home Companion. Í sinni hinstu kveðju til Altmans segir hún að leikstjórinn hafi verið sér næstum jafn náinn og faðir sinn eða afi, en orðar það helst til klaufalega. Blaðamenn vestra hafa gert gys að að leikkonunni og sagt að Altman hefði hlegið hefði hann lesið kveðjuna.

Talsmaður Lohan tekur hins vegar upp hanskann fyrir ungstirnið og segir að hún hafi skrifað skilaboðin í lófatölvuna sína nokkrum augnablikum eftir að hún frétti af láti leikstjórans. „Lindsey var miður sín og hágrátandi. Robert Altman var henni mjög kær og þótt hún hafi skrifað eitthvað í mikilli geðshræringu ætti fólk að virða að þetta var skrifað í hjartans einlægni."