Ljótur blettur á bænum

Þegar ekið er inn í Reyðarfjörð má sjá stóran og mikinn ruslahaug sem samanstendur af brotajárni, gömlum dekkjum og ýmsu öðru drasli. Landið, sem er einn hektari að stærð, er í eign Fjarðabyggðar en endurvinnslu­fyrirtækið Hringrás leigir það af bænum. Gríðarleg sjónmengun er af haugnum og er megn óánægja meðal bæjarbúa með hvernig staðið var að leigu landsins.

Þorbergur N. Hauksson, sem er stjórnarformaður Sorpsamlags Mið-Austurlands og situr í bæjarstórn Fjarðabyggðar, segir að það hafi svo sem verið vitað að sjónmengun hlytist af leigu landsins til Hringrásar, en ástandið sé óeðlilegt nú vegna byggingar Kárahnjúkavirkjunar. "Við verðum öll að horfa upp á mikið umrót á meðan á þessu stendur, það er fylgifiskur framkvæmda. Einhvers staðar verður þetta að vera."

Samkvæmt Þorbergi á að vera búið að hreinsa svæðið um miðjan júlí, en þegar er farið að pressa ruslið og á haugurinn að minnka töluvert á næstu dögum. Athygli vekur að nýbúið er að leigja ítalska verktakafyrirtækinu Impregilo sex hektara lóð við hlið haugsins til ársins 2008, þar sem áætlað er að geyma vinnuvélar á meðan verið er að flytja þær úr landi eftir að virkjanagerð lýkur.