Óléttar konur sagðar í hættu vegna lokana

Meðgöngudeild og sængurkvennadeild Landspítala - Háskólasjúkrahúss voru sameinaðar 1. júní síðastliðinn og var það liður í árlegum samdrætti sjúkrahússins vegna sumarleyfa starfsfólks. Sameining deildanna átti að standa til 27. júní en aðeins tveimur dögum seinna var starfsemi þeirra aftur skilin að vegna álags á starfsfólk. Fyrirhugað er að sameina deildirnar frá 21. júlí til 24. ágúst næstkomandi en Hildur Harðardóttir, yfirlæknir sængurkvenna- og meðgöngudeildar, segir að unnið sé að því að koma í veg fyrir það.

Stjórn Ljósmæðrafélags Íslands hefur lýst yfir áhyggjum vegna þessara fyrirætlana og telur að aðgerðir sem þessar geti valdið barnshafandi konum miklum óþægindum og jafnvel hættu.

Meðgöngudeild þjónar konum með vandamál á meðgöngu. Þar er rekin bæði göngudeildarþjónusta og þjónusta við konur sem þurfa innlögn vegna vandamála sem upp koma á meðgöngu. Á sængurkvennadeild eru konur sem hafa tekist á við erfiðar fæðingar eða átt fyrirbura. Auk þess liggja þar konur eftir keisaraskurði. Á deildinni eru tuttugu rúm og er þetta eina sængurkvennadeildin á höfuðborgarsvæðinu.

Guðlaug Einarsdóttir, formaður Ljósmæðrafélagsins, segir að þessar deildir séu yfirfullar flesta daga og þá sérstaklega sængurkvennadeildin. "Á meðgöngudeildinni liggja konur ekki upp á grín heldur er um að ræða fársjúkar barnshafandi konur sem að þurfa á mesta eftirlitinu og þjónustunni að halda á meðgöngunni.

Þetta eru konur sem eru í áhættumeðgöngu vegna meðgöngueitrunar, yfirvofandi fyrirburafæðinga og annarra sjúkdóma sem stefna móður í hættu eða barninu sem hún gengur með." Guðlaug segir að konurnar séu lagðar inn til að njóta rólegheita og hvíldar en einnig til rannsókna og eftirlits. Slíkt næði fái þær ekki verði þeim gert að liggja fimm saman á einni stofu á sængurkvennadeildinni í sumar.

Ljósmæðrafélagið hefur einnig lýst áhyggjum sínum vegna kvenna á Suðurnesjum sem munu þurfa að sækja þjónustu til Reykjavíkur vegna lokunar fæðingardeildar Heilbrigðisstofnunar Suðurnesja 9. júlí til 7. ágúst. Félagið telur að lokunin á Suðurnesjum hafi í för með sér stóraukið álag á ljósmæður LSH, sem munu þurfa að sinna þeim konum sem annars myndu fæða í sinni heimabyggð.