Lyfsalar buðu ekki upp á ódýrari lyf

Lyfjaverð Aðeins fjögur apótek af ellefu buðu upp á ódýrara samheitalyf bólgueyðandi verkjalyfs þegar verðlagseftirlit Alþýðusambands Íslands gerði verðkönnun í lyfjabúðum á höfuðborgarsvæðinu í vikunni.

Í könnuninni kom fram að verðmunur á frumlyfi og samheitalyfi með sömu verkun var allt að 69 prósent. Frumlyf eru lyf sem lúta vernd einkaleyfa tiltekinn tíma eftir að þau eru þróuð og framleidd. Eftir að einkaleyfið rennur út getur hver sem er framleitt samheitalyf sem hefur sömu virkni og tiltekið frumlyf.

Þegar sjúklingur framvísar lyfseðli með frumlyfi er lyfsölum skylt, samkvæmt reglugerð um afgreiðslu lyfseðla, áritun og afhendingu lyfja, að benda viðkomandi á ódýrara samheitalyf sé það til ef það munar fimm prósentum eða meira í verði.

Aðeins fjögur apótek buðu upp á ódýrara samheitalyf bólgueyðandi verkjalyfs sem var meðal þeirra lyfja sem könnunin náði til. Við eftirgrennslan blaðamanns kom í ljós að öll apótekin höfðu þó samheitalyf bólgueyðandi verkjalyfsins til sölu hjá sér og alls staðar var verðmunur meiri en fimm prósent milli samheitalyfsins og frumlyfsins. Minnstur var verðmunurinn 27 prósent og mestur 51 prósent. Apótekin sem buðu samheitalyfið eru Árbæjarapótek, Garðsapótek, Laugarnesapótek og Lyfjaver.

Matthías Halldórsson aðstoðarlandlæknir segir lyfsala bera ábyrgð á að benda á ódýrari samheitalyf en Lyfjastofnun hafi eftirlit með lyfsölum. Landlæknisembættið gerir ráð fyrir að Lyfjastofnun grípi til sinna ráða þar sem lyfsalar virðast ekki vera að standa sig að þessu leyti.

Rannveig Gunnarsdóttir, forstjóri Lyfjastofnunar, segir að þetta tiltekna mál verði rætt innan stofnunarinnar. Við höfum rætt um að það þurfi að skerpa á vinnureglum lyfsala og þetta er enn frekari vísbending um að eitthvað þarf að gera. Við alvarleg eða endurtekin brot á reglugerðum getur Lyfjastofnun veitt lyfsölum áminningu. Sé ekki brugðist við henni getur stofnunin lagt til við heilbrigðisráðuneytið að viðkomandi lyfsali verði sviptur leyfi.

Í verðkönnuninni sem um ræðir voru sett upp dæmi af tveimur sjúklingum. Í fyrra dæminu var um mígrenilyf, bólgueyðandi verkjalyf og ofnæmislyf fyrir 51 árs konu að ræða. Heildarverðið á þessum þremur lyfjum var lægst í Garðsapóteki eða 6.655 krónur og hæsta verðið í Skipholts apóteki eða 10.279 krónur. Verðmunur var því 54 prósent á milli lyfjabúða.

Í seinna dæminu var um blóðþrýstingslyf og sýklalyf fyrir 76 árs ellilífeyrisþega að ræða. Lægsta heildarverð lyfjanna var í Garðsapóteki eða 2.189 krónur. og hæsta verðið var í Skipholtsapóteki og Lyf og heilsu þar sem lyfin kostuðu 4.061 krónur. Verðmunur milli lyfjabúða var 86 prósent.