Fá sjaldan þyngri dóm en skilorð

Þeir sem ráðast á lögreglumenn eru sjaldan dæmdir til þyngri refsingar en skilorðsbundinnar fangelsisvistar. Það er að segja ef málið fer yfirleitt fyrir dóm, en að sögn talsmanns Landssambands lögreglumanna eru 90-95 prósent þessara mála felld niður áður en þau fara fyrir dóm.

Í vor var dæmt í máli manns sem beit lögreglumann í handarbakið þannig að honum blæddi, en maðurinn var smitaður af lifrarbólgu C. Hann laug því líka til að hann væri HIV-smitaður. Lögreglumaðurinn slapp við smit en þurfti að bíða í tíu mánuði eftir niðurstöðum læknarannsókna. Ákærði var dæmdur í sjö mánaða skilorðsbundið fangelsi.

Einnig var nýlega dæmt í máli þar sem drukkinn ökumaður ók bifreið sinni á lögreglumann sem stóð þar hjá, með þeim afleiðingum að hann slasaðist á hné. Maðurinn keyrði því næst inn í bílageymslu þannig að lögreglu­maðurinn dróst inn með bílnum. Maðurinn kýldi hann loks í magann þegar lögreglumaðurinn reyndi að handjárna hann. Ákærði var dæmdur í fjögurra mánaða skilorðsbundið fangelsi.

Landssamband lögreglumanna hefur sent dómsmálaráðherra greinargerð þar sem meðal annars er bent á að of vægar refsingar viðgangist vegna hótana eða ofbeldis gagnvart lögreglumönnum.