Stefnt að sátt um samninga í vikunni

Halldór Ásgrímsson, fráfarandi forsætisráðherra, vonast til þess að samkomulag náist við fulltrúa verkalýðshreyfingarinnar og Samtaka atvinnulífsins um gerð kjarasamninga í þessari viku. "Ég hef átt góðar viðræður við fulltrúa verkalýðshreyfingarinnar og Samtaka atvinnulífsins að undanförnu. Ég vonast til þess að þeirri vinnu geti lokið í þessari viku, þar sem mikilvægt er að eyða óvissu um þessi mál sem fyrst," sagði Halldór að loknum næst síðasta ríkisstjórnar­fundinum sem hann stýrir, í stjórnarráðshúsinu í gær.

Eins og greint var frá í Fréttablaðinu um síðastliðna helgi áttu Geir H. Haarde og Halldór fund með forystu Alþýðusambandsins í hádeginu síðastliðinn föstudag þar sem línur voru lagðar fyrir áframhald á viðræðunum.

Fulltrúar vinnumarkaðarins hafa lýst yfir áhyggjum sínum á verðbólgunni hér á landi að undanförnu en ekki ríkir einhugur um það hvernig er best að vinna gegn henni.

Eins og greint var frá í Fréttablaðinu í gær, hafnaði ríkisstjórnin kröfu Alþýðusambandsins um að koma á fót nýju, lægra skattþrepi fyrir láglaunafólk og þá var hún heldur ekki tilbúin til þess að færa lífeyrisréttindi ráðherra, þingmanna og æðstu embættismanna í sama horf og hjá öðrum þjóðfélagshópum.

Gylfi Arnbjörnsson, framkvæmdastjóri Alþýðusambandsins, segir það vera mikil vonbrigði að ríkisstjórnin hafi ekki verið tilbúin til þess að verða við þessum kröfum. "Staðan í þessu máli er óljós og það er alveg ljóst að okkur greinir á við ríkisstjórnina um hvernig best sé að hátta málum," og sagði ljóst að það væri ágreiningur um það hvort skynsamlegt væri að hafa meira en eitt skattþrep. "Við teljum að það sé nauðsynlegt að gera breytingar á skattkerfinu með það fyrir augum að bæta stöðu hinna lægst launuðu. Við núverandi verðbólgustöðu er nauðsynlegt að taka skynsamlega á þessum málum."

Síðasti fundur ríkisstjórnar undir forystu Halldórs Ásgrímssonar fer fram á fimmtudaginn en viðræðum um kjarasamninga verður fram haldið út vikuna.