Kveikt í blaðabunka

Slökkvilið höfuðborgarsvæðisins var kallað út að gamla Hampiðjuhúsinu við Brautarholt í fyrrinótt. Þetta er í annað skiptið sem slökkvilið höfuðborgarinnar er kallað út vegna elds í húsinu á rúmum mánuði.

Frá því að starfsemi lagðist af í húsinu hafa heimilislausir haldið þar til. Rafmagn hefur verið tekið af húsinu og vatn sömuleiðis og því bregður fólkið oft á það ráð að kveikja eld til að ylja sér við, oft og tíðum með fyrrgreindum afleiðingum.

Bjarni Kjartansson, sviðsstjóri forvarnarsviðs slökkviliðsins, segir menn þar á bæ hafa miklar áhyggjur af húsinu. Þrátt fyrir að það sé lítið í húsinu þá er hellingur í byggingarefnum hússins sjálfs sem getur brunnið og valdið þó nokkrum eldsvoða, segir Bjarni. Húsið er í eigu Fjárfestingafélagsins Vaxtar og segir Hulda Sif Þorsteinsdóttir, talsmaður félagsins, að unnið hafi verið með lögreglu að gera húsið mannhelt en að erfitt sé að halda fólki frá því að komast inn ætli það sér það á annað borð.

Beðið er eftir að nýtt deiliskipulag verði samþykkt fyrir svæðið og þá verður húsið rifið.