Fimm prósent neyta eiturlyfja

Eiturlyfjaneytendur voru um tvö hundruð milljónir á síðasta ári. Þetta kemur fram í árlegri skýrslu Sameinuðu þjóðanna um eiturlyfjaneyslu í heiminum, þar sem teknar voru saman tölur frá árunum 2003 og 2004. Það eru fimm prósent jarðarbúa ef miðað er við aldursbilið 15 til 64 ára. Fjölgun neytenda var um fimmtán milljónir milli ára og segja skýrsluhöfundar enga von um að hún verði minni á næsta ári. Kannabis er langvinsælasta eiturlyfið og í stöðugri sókn. Munar mest um aukna framleiðslu, sölu og neyslu á maríúana og hassi þegar heildarfjöldi eiturlyfjaneytenda er reiknaður út en kannabisneytendur eru um 160 milljónir. Í skýrslunni kemur fram að allir þættir bendi til þess að markaður með kannabisefni sé að stækka og engin ástæða til að ætla að þenslan taki enda. Mjög er litið til Afganistan þegar stærð markaðsins með ópíumefni er ákvarðaður. Talið er að 87 prósent af ólöglegum ópíumefnum sé uppruninn þar í landi og hefur framleiðsla efnisins fluttst þangað frá Suðaustur Asíu þar sem hún hefur minnkað um 78 prósent. Skýrsluhöfundar eru vongóðir um að með nýrri ríkisstjórn og stöðugra ástandi í Afganistan náist að minnka framleiðsluna. Afganir eru æstir í að sýna alþjóðasamfélaginu fram á þetta og brenndu á dögunum sextíu tonn af ópíum á bálköstum í tilefni að alþjóðlegum baráttudegi gegn fíkniefnum. Heróín er vinsælasta ópíumefnið og er það jafnframt eiturlyfið sem veldur mestum vandamálum, samkvæmt skýrslunni. Mikil vonbrigði eru að ræktun á kókarunna hefur aukist í Perú og Bólivíu en úr laufum kókarunna er unnið kókaín. Ræktunin hefur dregist saman í Kólumbíu þótt landið framleiði enn um helming alls kókaíns sem er í umferð. Neysla kókaíns er að dragast saman í Bandaríkjunum á meðan hún eykst í Evrópu. Heildarverðmæti allra eiturlyfja sem seld voru í smásölu árið 2003 er áætlað um 322 milljónir Bandaríkjadollara, en það jafngildir tæpum 21 milljarði íslenskra króna.