Fjöldinn á við meðalbæjarfélag

Íslendingum sem kaupa sér sumarhús á Spáni hefur fjölgað stórlega á undanförnum árum. Talið er að nokkur hundruð Íslendinga eigi fasteignir á svæðinu kringum borgina Alicante á Costa Blanca. Fjöldi Íslendinga á svæðinu þegar flest er á vorin og haustin samsvarar meðal bæjarfélagi á landsbyggðinni eða sex til áttahundruð manns. Stór hluti þessa fólks er í Félagi sumarhúsaeigenda á Spáni en það var stofnað 1989. Guðmundur Heiðarsson er formaður félagsins og hann segir að íslenskum húseigendum á Spáni hafa fjölgað verulega á síðustu árum. "Það varð mikil aukning fyrir sex árum og svo aftur fyrir tveimur til þremur árum" segir hann. Mikið af þessu fólki er komið á eftirlaun að sögn Guðmundar og býr margt af því lungann úr árinu þarna suðurfrá enda fær fólk mun meira fyrir eftirlaunin sín á Spáni en á Íslandi. "Ætli það séu ekki 150 - 170 manns sem hafa vetursetu þarna", segir hann. Margt af því fólki dvelst síðan hér heima yfir sumartímann og leigir eða lánar þessar eignir sínar á Spáni. Gríðarleg uppbygging hefur átt sér stað á þessu svæði sunnan við Alicante þar sem flestir Íslendingarnir hafa keypt sér hús og er Íslendingabyggðin hvað þéttust í og við bæinn Torrevieja. Guðmundur segir fólk kaupa alls kyns eignir bæði íbúðir og einbýlishús. "Ég gæti trúað að verð fyrir 80-100 fermetra hús á þessu svæði sé í kringum 10-12 milljónir króna". Margir fjármagna húsakaup á Spáni með því að selja eignir hér heima eða minnka við sig og nota mismuninn til húsakaupa í sólinni. Aðrir fá lán í bönkum á Spáni en þar sem þeir lána ekki eftirlaunafólki segist Guðmundur vita til þess að fólk skrái eignir sínar þarna á börn sín til að fá lán. "Börnin erfa þetta hvort eð er þegar upp er staðið" segir Guðmundur Heiðarsson formaður Félags sumarhúsaeigenda á Spáni.