Fagnar reglum um fjármál þingmanna

Jóhanna Sigurðardóttir, þingmaður Samfylkingarinnar, fagnar því að framsóknarmenn vilji setja reglur um fjármál og eignir Alþingismanna. Hún hafi lagt það til í mörg ár. Ísland er eina landið á Norðurlöndum sem setur ekki eina einustu reglu um það hvernig fjármálum þingmanna og ráðherra er háttað. Jóhanna Sigurðardóttir, þingmaður Samfylkingarinnar, vill að forsætisnefnd þingsins setji strax reglur sem koma í veg fyrir spillingu. Hún fer fram á það að settar verði reglur varðandi boðsferðir, gjafir og setu í stjórnum fyrirtækja og stofnana. Reyndar telji hún að það sé vafasamt að þingmenn eigi að geta setið í stjórnum fyrirtækja og stofnana. Annars staðar á Norðurlöndum eru þingmenn beðnir um að tilkynna um öll störf sem þeir sinna utan þingsins og hvað þeir fá í laun og skiptir engu hvort um einkafyrirtæki eða ríkisstofnanir er að ræða. Þá greina þeir frá öllum fjárhagslegum stuðningi og gjöfum sem þeir fá sem og ferðum til útlanda sem fyrirtæki eða félagasamtök borga fyrir. Þá þurfa þingmenn og ráðherrar að greina frá öllum hlutabréfum eða öðrum eignum sem fara yfir 500 þúsund íslenskra króna. Aðeins er um beiðnir að ræða nema í Finnlandi en þar eru þingmenn og ráðherrar skyldugir til að gefa þessi mál upp. Jóhanna hefur barist fyrir slíkum reglum í áraraðir án þess að hljóta nægilegar undirtekir þar til forsætisráðherra léði máls á því á Alþingi í gær. Jóhanna segist telja að menn hafi gert þetta vegna þess að þeir hafi verið komnir út í horn vegna þeirrar umræðu sem hafi verið um fjármálalega spillingu í tengslum við einkavinavæðinguna, eins og hún orðar það. Aðspurð hverjar hún telji ástæðurnar fyrir því að ekkert hafi verið gert segir Jóhanna að þingmenn hafi í krafti valds síns reist ákveðnar girðingar í kringum sig og hafi ekki tekið þátt í því gegnsæi sem verið hafi í stjórnsýslunni en þetta sé sem betur fer að breytast