Efast um að Woods toppi Nicklaus

Golfsérfræðingurinn Peter Alliss hjá BBC segist efast um að Tiger Woods nái að slá met Jack Nicklaus yfir flesta sigra á stórmótum á ferlinum. Woods, sem er þrítugur, hefur sigrað á 10 stórmótum til þessa en Nicklaus vann 18 slík á sínum ferli, þar af 11 fyrir þrítugt.

"Ég er enn nokkuð viss um að Woods komi ekki til með að fara fram úr Nicklaus. Það er enn mjög langt í það. Vel má vera að honum takist það einn daginn, en hann hefur þurft að mæta miklu andstreymi á leið sinni á toppinn. Hann er frábær kylfingur og það hafa verið sannkölluð forréttindi að fylgjast með honum spila, en það er ekki auðvelt að vera jafn stórt nafn og hann í dag. Myndavélarnar elta þig í hvert fótmál og það er erfitt að eiga sér einkalíf."