Engin ástæða til að óttast skyndisölu á skuldabréfum

Erfitt er að átta sig á því hvaða áhrif skuldabréfaútgáfa erlendra fjárfesta hefur á íslenskt efnahagslíf. Eiríkur Guðnason, seðlabankastjóri, segir að engin ástæða sé til að óttast að fjárfestarnir selji allir bréf sín á sama tíma. Jafn líklegt sé að þeir vilji eiga skuldabréfin áfram eða gefa út ný. Forstöðumaður Hagfræðistofnunar telur íslenska hagkerfið hins vegar komið að þolmörkum varðandi útgáfu erlendra aðila á skuldabréfum í íslenskum krónum.

Erlendir fjárfestar hafa gefið út skuldabréf í íslenskum krónum fyrir rúma 100 milljarða króna, þar á meðal eru austurríska ríkið og Alþjóðabankinn sem aflar sér fjár á mörkuðum með því að gefa út skuldabréf.

Eiríkur Guðnason seðlabankastjóri segir að erfitt sé að átta sig á því hvaða þýðingu skuldabréfaútgáfan hafi fyrir íslenskt efnahagslíf. Sumir óttist að þetta geti haft alvarleg áhrif síðar þegar eigendur bréfanna þurfa að selja, sérstaklega þegar margir gera það samtímis. En ekki sé ástæða til að óttast það. Bæði séu fjárfestarnir margir og líklegt að þeir vilji eiga skuldabréfin áfram eða gefa út ný þannig að bréfin verði til í eignasöfnum ýmissa aðila. Útgáfán geti valdið flökti á gengi krónunnar en ekki sé nein sérstök ástæða til að óttast það. Það vilji Íslendingum til happs að vera ekki lengur með gengismarkmið heldur verðbólgumarkmið.

Eiríkur segir skuldabréfaútgáfuna jákvæða fyrir þjóðina að því leytinu til að útlendingar kynnist íslensku krónunni. Þeir munu kynna sér íslenskt efnahagslíf í meiri mæli en áður vegna þessa. Þá sé sú staðreynd að Alþjóðabankinn sé farinn að gefa út þessi bréf viðurkenning á því að íslenska krónan sé gjaldmiðill meðal gjaldmiðla í heiminum.

Tryggvi Þór Herbertsson, forstöðumaður Hagfræðistofnunar, telur íslenska hagkerfið vera að nálgast þolmörk hvað varðar útgáfu erlendra aðila á skuldabréfum í íslenskum krónum. En útgáfan er nú kominn í eitt hundrað milljarða, eða sem svarar til um eins þriðja af fjárlögum íslenska ríkisins.