Kominn inn í rússneska landhelgi

Rússneski togarinn Elektron, sem tekinn var við ólöglegar veiðar við Svalbarða á laugardag en stakk síðan af með tvo norska strandgæslumenn, er kominn inn í rússneska landhelgi. Togarinn er á leið til Múrmansk í fylgd rússnesks herskips sem beið hans við landhelgismörkin. Fjögur norsk strandgæsluskip sem eltu togarann eru fyrir utan tólf mílna mörkin. Strandgæsluskipin gátu ekkert annað gert en að elta togarann en ekki þótti óhætt að gera tilraunir til að stöðva skipið vegna vonskuveðurs. Þá segja norsk stjórnvöld að aldrei hafi gefist færi á að senda menn úr sérsveit norska hersins um borð í skipið en sérsveitarmennirnir eru sérþjálfaðir í að ná aftur skipum sem hefur verið rænt.