Nýr fellibylur veldur hækkunum

Hitabeltisstormurinn Vilma verður væntanlega að fellibyl á morgun og urðu fréttir þess efnis til þess að heimsmarkaðsverð á olíu hækkaði um þrjú prósent í dag. Vilma er 21. fellibylurinn til að láta til sín taka í Karíbahafi í ár og þarf að fara allt aftur til ársins 1933 til að finna dæmi þess að jafn margir fellibylir hafi riðið yfir Karíbahaf. Þetta þýðir að Bandaríska veðurstofan er orðin uppiskroppa með nöfn yfir fellibyli og hitabeltisstorma ársins. Á hverju ári er notaður listi með 21 nafni. Síðasta nafnið í ár er Vilma. Myndist enn einn hitabeltisstormurinn verður hann nefndur eftir varalista, sem hefur aldrei verið notaður hingað til. Hann byggir á gríska stafrófinu og er fyrsta nafnið á honum: Alfa. Viðvaranir höfðu verið gefnar út í strandhéruðum Hondúras og á Grand Cayman, stærstu eyjunni í Cayman-eyjaklasanum suður af Kúbu. Búist er við því að Vilma fari yfir Yucatanskaga í Mexíkó á laugardag og þaðan inn á olíuborpallasvæði í sunnanverðum Mexíkóflóa. Olíuborpallar þar hafa þegar staðið af sér tvo fellibyli og nokkra storma en í hvert skipti hefur dregið eitthvað úr framleiðslu. Vindhraðinn er kominn í 80 kílómetra á klukkustund og fer vaxandi. Hitabeltisstormar verða að fellibyljum þegar vindhraðinn fer í 119 kílómetra á klukkustund.