Ekki þverfótað fyrir Línu langsokk

Um þrjú þúsund manns, að stórum hluta börn, tóku þátt í skrúðgöngu í miðborg Stokkhólms þar sem haldið var upp á að 60 ár eru liðin síðan bók Astrid Lindgren um Línu langsokk kom fyrst út. Skrúðgöngunni lauk með mikilli hátíð þar sem boðið var upp á fjölda skemmtiatriða í anda bókarinnar. Fjöldi barna var mættur í gulum kjól, mislitum sokkum og með rauða hárkollu í takt við búninginn sem einkenndi Línu langsokk. Börnin kepptu í margvíslegum þrautum, svo sem þeirri hver gæti spýtt lengst, og fóru í reipitog við sjóræningja. Þó haldið hafi verið upp á 60 ára afmæli bókarinnar um Línu langsokk í gær er alla jafna miðað við 13. september sem afmælisdag bókarinnar, en þann dag 1945 samþykkti útgefandi að gefa hana út. Hátíðinni var flýtt til að tryggja gott veður.