Tíu létust við King´s Cross

CNN greindi rétt í þessu frá því að tíu hefðu farist í árásinni við King´s Cross stöðina. Ferðir Eurostar-lesta um Ermasundsgöngin hafa verið felldar niður í kjölfar árásanna. Víðar í Evrópu berast fregnir sem ýta undir óttann: tvær stórar verslunarmiðstöðvar hafa til að mynda verið rýmdar í Búdapest og í Varsjá varð mikið uppnám vegna bruna í megin stjórnarbyggingunni þar. Hann má hins vegar rekja til eldglæringa vegna byggingavinnu. Hinum megin Atlantshafsins, í Bandaríkjunum, hafa öryggisráðstafanir í New York og Washington verið stórauknar, einkum við neðanjarðarlestarstöðvar. Talsmaður heimavarnaráðuneytisins þar segir hins vegar engar vísbendingar um að neitt sé á seyði þar.