Ársfundi hvalveiðiráðsins lokið

Ársfundi Alþjóðahvalveiðiráðsins lauk í gær í Ulsan í Suður-Kóreu án þess að heimilaðar yrðu hvalveiðar í atvinnuskyni að nýju. Hvalveiðibann hefur nú staðið í hartnær tvo áratugi en Íslendingar hafa að undanförnu stundað vísindaveiðar á hrefnu. Íslenska sendinefndin telur að fyrirsjáanlegt sé að hvalveiðar verði ekki hafnar í nánustu framtíð og að fundurinn hafi því valdið verulegum vonbrigðum. Allar tillögur sem lagðar voru fram á þinginu í anda þess að atvinnuhvalveiðar yrðu hafnar að nýju voru felldar. Japanar lögðu ítrekað fram tillögur um ýmis málefni en allar tillögurnar voru felldar. Tillaga Danmerkur í gær um að stjórnkerfi fyrir hvalveiðar yrði endurskoðað var einnig felld. Gunnlaugur Konráðsson hrefnuveiðimaður, sem hóf fyrst hrefnuveiðar árið 1968, segir að niðurstaðan á fundinum hafi verið eins og hann hafi búist við. "Þetta er bara vitleysingasamkoma. Þarna eru menn sem hafa það að atvinnu að koma í veg fyrir að hvalveiðiráðið gegni sínu hlutverki og að menn geti fjallað þar um mál á málefnanlegum grundvelli. Ástralir hafa gífurleg áhrif á þinginu og mótmæla hvalveiðum ítrekað. Þeir drepa síðan sjálfir hundruð þúsunda kengúra á hverju ári og blikna ekki," segir Gunnlaugur. Hann segir mikið af hval í íslenskri landhelgi og ekkert sé því til fyrirstöðu að veiða dýrin. "Á það hefur verið bent að við séum með svo villimannslegar veiðar. Ég veit ekki hvernig aðrar veiðar eru, en ég sé ekki að hvalveiðar séu eitthvað öðruvísi. Kjarni málsins er sá að við eigum að hefja veiðar hér strax og hætta að velta fyrir okkur hvað öðrum finnst. Við getum veitt okkar hvali innan okkar landhelgi og því fyrr sem við hefjum þær veiðar, því betra," segir Gunnlaugur.