Verður að halda að sér höndum

"Það má í raun kalla það fásinnu að ríki og sveitarfélög skuli ekki halda að sér höndum þegar kemur að framkvæmdum ýmiss konar," segir Davíð Lúðvíksson, forstöðumaður hjá Samtökum iðnaðarins. Hann segir samtökin hafa miklar áhyggjur af ríkisfjármálunum og tekur undir með Alþjóðagjaldeyrissjóðnum að brýn nauðsyn sé á meira aðhaldi en verið hefur. Framkvæmdagleði Íslendinga er mikil og hvarvetna sem litið er má sjá iðnaðar- og verkamenn reisa byggingar eða leggja vegi og verða ekki síst íbúar á höfuðborgarsvæðinu varir við þá þenslu. Víða í miðborg Reykjavíkur eru götur lokaðar vegna stærri framkvæmda og í nágrenni borgarinnar, á þjóðvegi 1 í báðar áttir, munu standa yfir vegaframkvæmdir fram á vetur. Nýjar byggingar rísa á hverjum degi í nýjum hverfum sveitarfélaganna á suðvesturhorni landsins á sama tíma og hundruð verkamanna byggja háhýsi í miðbænum. Annars staðar er einnig hafin eða í undirbúningi bygging heilla nýrra hverfa eins og í Garðabæ eða norður á Akureyri. Að ógleymdri þeirri þenslu sem skapast hefur fyrir austan land með byggingu Kárahnjúkavirkjunar og álvers Alcoa á Reyðarfirði. Davíð segir að stjórnvöldum hafi mistekist hrapallega að koma í veg fyrir þenslu með því að standa sjálft fyrir verkefnum sem að öllu jöfnu hefði mátt bíða með þangað til um hægðist. "Efnahagsaðstæður eru með þeim hætti að nauðsynlegt er að grípa inn í og sýna varkárni. Hátt gengið er að ganga af mörgum útflutningsgreinum dauðum og fyrirséð er að þegar og ef gengið lækkar þá hækkar verðbólgan úr öllu valdi. Þá er eðlilega búið að veikja mörg fyrirtæki svo mikið að verðbólgan gæti auðveldlega gengið af mörgum þeirra dauðum."