Bensín aldrei dýrara

"Mér finnst nóg komið af svo góðu og heimta að stjórnvöld geri það sem í þeirra valdi stendur til að koma til móts við neytendur," segir Sigríður Guðjónsdóttir. Hún er einn þeirra þúsunda bíleigenda sem verða að gera sér að góðu að greiða einhver hæstu verð sem sést hafa fyrir eldsneyti hérlendis og er afar ósátt. Verð á bensíni fór í sögulegt hámark í gær þegar olíufélögin Olís, Skeljungur og Esso hækkuðu verð sín í fjórða sinn í þessum mánuði. Kostar nú lítri af 95 oktana bensíni 109,60 í sjálfsafgreiðslu hjá Esso og Skeljungi en tíu aurum meira hjá Olís. Sé farið fram á fulla þjónustu á þessum stöðvum kostar lítrinn tæpar 115 krónur. Bensínhækkanirnar koma á sama tíma og þúsundir Íslendinga hugsa sér til hreyfings í sumarfríum sínum. Þær hafa í för með sér að fjölskylda sem ferðast hringinn kringum landið í rólegheitum og fyllir tankinn fjórum sinnum á leiðinni með þjónustu greiðir tæpar 28 þúsund krónur fyrir herlegheitin. Sigríður segir að hægt sé að spara sér upphæðir með því að dæla sjálf á bíl sinn en verðið sé engu að síður afar hátt. "Mér finnst þáttur stjórnmálamannanna stór í þessu vegna þess að álögur á eldsneytið fara hækkandi og þeir mættu standa sig betur í að standa vörð um hag borgaranna í landinu." Magnús Ásgeirsson, yfirmaður eldsneytiskaupa hjá Esso, segir að verð á hráolíu hafi áður verið hærra en nú er en man ekki eftir eins háu bensínsverði. "Ég met það svo að frekari hækkanir séu ekki útilokaðar næstu vikurnar en verð geti tekið að lækka á ný þegar líður fram á sumarið. Það skýrist af því að eftirspurn á erlendum mörkuðum er í hámarki þessi misserin bæði í Bandaríkjunum og eins í Evrópu og það hefur áhrif hingað."