Fáir mótmæltu varðhaldi yfir Gill

Fáir sinntu því kalli að mótmæla gæsluvarðahaldi yfir Paul Gill við dómsmálaráðuneytið í dag. Gill er einn þremenninganna sem skvettu grænu skyri á ráðstefnugesti á Nordica-hóteli og sá eini sem situr í gæsluvarðhaldi vegna verknaðarins. Það mættu álíka margir mótmælendur og laganna verðir á mótmælastöðuna og fámennt var í báðum hópum. Eftir mótmælin á Nordica-hóteli í fyrradag var atvinnumótmælandinn Paul Gill úrskurðaður í gæsluvarðhald fram á mánudag, íslensku mótmælendurnir tveir, Ólafur Páll Sigurðsson og Arna Ösp Magnúsardóttir, voru hins vegar látin laus. Gill hefur áfrýjað gæsluvarðhaldsúrskurðinum og hefur Hæstiréttur þrjá daga til að skera úr um þá beiðni. Í yfirlýsingu til dómsmálaráðherra er skýrt tekið fram að öll þrjú hafi þau átt jafnan þátt í verknaðinum. Hvaða skoðun sem menn hafi á aðgerðum þeirra sé lýðum ljóst að gæsluvarðshaldsúrskurður yfir Gill einum sé hróplegt ranglæti. Aðspurð hver hún telji að ástæðan sé fyrir því að Gill sé í gæsluvarðhaldi en ekki hún og Ólafur segir Arna Ösp að hún fái ekki betur séð en verið sé að reyna að gera blóraböggul úr Gill, hugsanlega vegna þess að hann sé útlendingur. Hjá rannsóknardeild lögreglunnar fengust þær upplýsingar að verið væri að skoða þátt Pauls Gills sérstaklega, til dæmis hvort hann hefði skipulagt mótmælin. Þá væri hann búsettur erlendis og því rétt að hann væri til taks meðan málið væri í rannsókn. Arna Ösp, gefur lítið fyrir þær útskýringar. Hún segir að eftir því sem hún best viti séu þau Ólafur ekki í farbanni. Þá búi Gill utan Schengen-svæðisins og þyrfti þess vegna hvort eð er að framvísa skilríkjum til þess að komast úr landi. Líkt og Paul Gill á Arna Ösp yfir höfði sér ákæru vegna skyrslettumótmælanna á Nordica-hóteli. Aðspurð segist hún ekki sjá eftir því að hafa tekið þátt í mótmælunum en hún myndi þó ekki gera þetta aftur á þennan hátt. Aðrar friðsamari aðgerðir komi vel til greina. Spurð hvort hún sé farin að skipuleggja eitthvað segir Arna Ösp að hún sé ekki byrjuð enn þá.