Kettir geymdir í gámi

Tuttugu og einn köttur var fjarlægður úr gámi þar sem þeir voru geymdir við ómannúðlegar aðstæður í þrjár vikur. Þetta er í þriðja sinn sem yfirvöld bregðast við vegna slæms aðbúnaðar kattanna. Það tók sex klukkustundir að ná dýrunum úr gámnum í gær, en í gámnum er búslóð konu sem á kettina. Lyktin þegar gámurinn var opnaður var vægast sagt hrikaleg enda höfðu dýrin ekki komist út til að losa sig við úrgang. Sigríður Ásgeirsdóttir, formaður Dýraverndunarsambands Íslands, segir gáminn hafa verið nánast fullan af húsgögnum og kössum og innan um þetta hafi kettirnir verið. Saga kattanna er þyrnum stráð. Í febrúar í fyrra voru sextán kettir teknir af konunni þar sem hún bjó á Njálsgötu. Kettirnir voru færðir í Kattholt en konan réð sér lögmann sem fékk kettina lausa úr Kattholti. Sigríður segir að síðan hafi frést af köttunum í Dugguvogi í september í fyrra. Þá hafi hún aftur kallað til lögreglu sem hafi kallað á dýralæknir. Farið hafi verið inn í húsið við Dugguvog og þar hafi verið 15 kettir og ástandið svakalegt. Í gær bárust Dýraverndunarsambandinu svo fréttir af köttunum í þriðja sinn þar sem þeir voru lokaðir inni í gámi. Kettirnir voru færðir í Kattholt en meðal þeirra voru nokkrir kettlingar. Aðspurð hverig kettirnir hafi verið á sig komnir við komuna í Kattholt segir Sigríður Heiðberg hjá Kattholti að þeir hafi ekki verið illa haldnir. Þeim hafi verið gefið að borða en aðstæður þeirra séu náttúrlega skelfilegar. Sigríður Ásgeirsdóttir segir að þess verði gætt að kettirnir verði ekki aftur teknir úr Kattholti því það sé alveg ljóst að konan sem átti þá hafi ekki burði til að vera með svo marga ketti. Hún segir enn fremur að sér þyki verst í málinu að dýraverndunaryfirvöld hafi brugðist alveg hrapallega. Strax í febrúar hefðu þau getað tekið á málinu og þá hefði ekkert af þessu þurft að gerast. Aðspurð hvort hún muni láta kettina af hendi aftur segir Sigríður Heiðberg að helst vilji hún það ekki en hún voni að yfirvöld dæmi kettina af eiganda þeirra. Að minnsta kosti meðan aðstæður eigandans séu eins og þær séu í dag þá valdi hann því ekki að vera með þá. Sigríður Ásgeirsdóttir segir að ekki sé fullvíst að ekki séu fleiri kettir í gáminum en ekki sé hægt að ganga úr skugga um það nema gámurinn verði tæmdur.