RKÍ á hamfarasvæðunum næstu 10 ár

Enn er mikið uppbyggingarstarf fyrir höndum á hamfarasvæðunum í Asíu þar sem flóðbylgjan reið yfir í lok síðasta árs - svo mikið að Rauði kross Íslands gerir ráð fyrir að starfa þar næstu tíu árin. Tæpir fjórir mánuðir eru liðnir frá því flóðbylgjan reið yfir í Asíu með hörmulegum afleiðingum. Tíu sendifulltrúar Rauða kross Íslands hafa unnið að hjálparstörfum í Indónesíu og Srí Lanka. Hólmfríður Garðarsdóttir, hjúkrunarfræðingur og ljósmóðir, var þeirra á meðal og lýsti reynslu sinni á opnum fundi hjá Reykjavíkurakademíunni í dag. Hólmfríður starfaði í fimm vikur í Banda Ache héraði á Súmötru þar sem 400 þúsund manna er enn saknað og um 150 þúsund eru taldir af. Hún starfaði í tjaldsjúkrahúsi á vegum Rauða krossins við frumstæðar aðstæður. Tók þátt í gleði íbúanna og sorg; tók á móti nýfæddum börnum og veitti þeim sem misst höfðu ástvini sína stuðning. Hún sagði bæði athyglisvert að upplifa mismunandi menningarhefðir og hvað margir höfðu misst mikið. Dæmi eru um að heilu fjölskyldurnar hafi þurrkast út. Þrátt fyrir að langur tími muni líða þar til lífið kemst aftur í eðlilegt horf hjá íbúum Banda Ache héraðs segir Hólmfríður mikinn kraft vera í uppbyggingarstarfi. Énn er verið að leita að og finna lík, auk þess sem fólk sé að koma sér upp heimili að nýju. Ljóst er að starfi Rauða kross Íslands á flóðasvæðunum er hvergi nærri lokið. Sigrún Árnadóttir, framkvæmdastjóri RKÍ, segir að samkvæmt áætlunum verði samtökin á flóðavæðunum næstu tíu ár, umfang uppbyggingarinnar sé það gríðarlegt.